नारायण .....कोविड व्हर्जन

नारायण .....कोविड व्हर्जन

“नारायण, सॅनिटायझरचे कॅन कुठे आहेत ?”

“नारायण , भटजींसाठी ट्रॅडिशनल लुकचं पीपीई किट येईल ना वेळेवर?”

“नारायण,डिजीटल थर्मामीटर फुटला “

“नारायण,गुगलमीट ची लिंक कोण शेअर करणार ?”

“नारुभावजी, हा कुंदन लावलेला मास्क ठेवून द्या तुमच्याजवळ , नंतर बिदाईच्या वेळेस मागून घेईन “

“नाऱ्या लेका , वर आयुषकाढा नाही आला अजून , व्याही पेटलाय”

पन्नास ठिकाणांहून येणारे पन्नास हुकूम नारायण शिताफीने परतवत असतो.ह्या कोविडच्या काळात नारायणवर निराळीच जबाबदारी पडली आहे .मोजक्या 50 जणांची यादी करणे , मुलीकडचे २५ नि मुलाकडचे २५ ... “अय्या , मग भटजी विसरलेच की” कुणीतरी मायरा किंवा आलिया असल्या चालू फॅशनच्या नावाची मुलगी प्री वेडिंग व्हिडीओ काॅन्फरन्समध्ये चिवचिवते  आणि स्वत:चे कौतुक करून घेते .

प्रत्यक्ष लग्नाच्या दिवशी ... सकाळी लवकर जाऊन हाॅल आणि आजूबाजूचा परिसर स्वच्छ करुन घेणे, काॅर्पोरेशनचा फ्युमिगेशन ट्रक येऊन फवारणी करुन गेला की नाही याची खात्री करुन घेणे .. वऱ्हाडी मंडळी जमायला लागली की त्यांचे डिजीटल थर्मामीटर ने टेंपरेचर घेणे , त्यांच्या हाताला अत्तर नाही तर सॅनिटायझर लावणे ,सोशल डिस्टन्सिंगच्या सर्कलमध्येच 

त्यांना बसवणे ही सारी कसरत फक्त नारायणच करु शकतो . भटजी आले की हात पाय धुवून त्यांना पीपीई किट चढवायला मदत करणे , करवल्यांच्या हट्टाखातर ऐनवेळेस मॅचिंग ग्लोव्हसाठी धावाधाव .....

बायकांच्या ओट्या भरायला आयुषकाढ्याची छोटी पाकिटं आणि मास्कचं जरीकाठी कापड तयार ठेवणे , 

एक ना दोन ! जवळच्या नातेवाईकांना गुगलमीटची लिंक पाठवणे आणि इतर सर्वांसाठी फेसबुक लाईव्ह आॅप्शन देणे हे त्याचंच काम ! मध्येच नवरामुलगा अडून बसला , पार्क अॅव्हेन्यू सारख्या वासाचंच सॅनिटायझर हवं म्हणून तेव्हा तुळशीच्या वासानेच कोरोना पळतो म्हणून तसं सॅनिटायझर आणलंय असं ठणकावून सांगत डझनाचं बाँक्स नारायणानं त्याच्या पुढ्यात आदळलं .तितक्यात झूमवरून जाॅईन झालेली थोरली आज्जी म्हणाली , “नारायणा , राबतोयस बाबा सारखा , कोपभर आयुषकाढा तर घे “ . नारायणाला थांबायला सवड नव्हती पण गुगलमीट साठी लॅपटाॅपचा स्क्रीन अॅडजस्ट करताकरता पाच मिनीटांत त्याने काढा पिऊन घेतला . 

“नवऱ्यामुलाकडली माणसं समंजस आहेत हो सगळी “ आजी झूमवरूनच बोलल्या .”डोंबलाची समंजस , मी म्हटलं , तुमची माणसं सोशल डिस्टन्सिंगचे सर्कल सोडून जवळजवळ येतायत , त्यांना लांब बसवा , तर मुलाचा काका म्हणतो कसा , मी काय पोलिस म्हणून आलोय का इथं ?आणि तो कोरोनाबिरोना आमच्या वाट्याला नाही जात , आम्ही प्राणायाम करतो रोज”नारायण चॅटबाॅक्समध्ये मेसेज टाकतो .आजींना एकूण मुलाकडच्यांना कोविडअवेअरनेस नाही हे कळते . यांवर मुलीकडच्या झूम मीटिंगमध्ये एकमत !!

एवढं करून लग्न या घटनेत नारायणाला कणभरही इंटरेस्ट नव्हता .पटापट फूड स्टाॅल्स लांब लांब लावून घेणं ,सर्विसबाॅईजनी ग्लोव्हज , फेसशील्ड , कॅप सगळं घातल्याची खात्री करुन घेणं हे त्याचंच काम ! जेवणातही आलं पुदिना मिरी तुळशीचा इम्युनिटीबूस्टर काढा ॲपिटायझर म्हणून ठेवायची आयडिया त्याचीच!

जेवणाचा मेन्यू देखील प्राेटिनयुक्त , सात्विक , घरगुती असतो .तिकडे लग्नविधी सुरू असताना नवरानवरी हळूच मास्क सरकवत नाहीत ना इकडेही त्याची नजर असतेच .

बिदाईच्या वेळेस नवरामुलगा ग्लोव्हज काढून शेकहॅंड करायला लागतो तेव्हा , “ हां हां वसंतराव , नो शेकहॅंड ! लांबूनच हात जोडून नमस्कार करा ! सुमे , मजेत रहा , stay home , Stay safe !! ‘’ असं म्हणताम्हणता त्याचा गळा भरून येतो . सगळे जातात.

मांडवात आता फक्त उरलेले मास्क , सॅनिटायझरचे रिकामे कॅन आणि क्लिनिंग करणारा मुलगा एवढेच असतात . सगळं आवरून भराभर फोटो फेसबुकवर अपलोड करून नारायण ही निघतो , चेहऱ्यावरचा फेस्टीव्ह मास्क काढून साधा घालून !!!

✍️✍️©️पल्लवी फाटक